PRESENTACIÓN DO LIBRO » UNHA TENDA AZUL COBALTO» DE ANTONIO YÁNEZ CASAL
PRESENTACIÓN DO LIBRO » UNHA TENDA AZUL COBALTO» DE ANTONIO YÁNEZ CASAL
O mércores 4 de xuño, o Centro Cívico converteuse —por unhas horas— nun escenario de festa literaria de pequeno formato, pero grandes contidos. O protagonista: Antonio Yáñez Casal, que viña presentar Unha tenda azul cobalto, a obra coa que obtivo o último Premio Pura e Dora Vázquez.
Acompañado polo infatigable Rafa Aguirrebengoa, o autor compartiu confidencias literarias, algunha teoría e moito bo humor ante un público reducido pero entregado, coma quen descobre unha xoia agochada nun caixón que case nunca se abre.
Rafa Aguirrebengoa puxo a primeira pedra da conversa cunha intervención digna de alfombra vermella… ou polo menos de libraría con cafeteira. Falounos da imaxinación como quen fala dun vello amor, do tempo como misterio que nunca se resolve e dos primeiros parágrafos dos libros. Nada menos que a Odisea saíu a colación, porque xa que se fala de literatura, falemos en serio.
Logo colleu o micro Antonio Yáñez, e o ton subiu medio grado de humor e retranca. Reivindicou a literatura xuvenil escrita en galego, iso si, sen moralinas nin manual de instrucións. “O didactismo, para as aulas; os libros, para o pracer”, veu dicir, sen dicilo exactamente así.
Non houbo masas nin cámaras, pero si moita atención e sorrisos cómplices. O público saíu encantado, como quen atopa un concerto secreto no medio da semana. Un deses momentos nos que as palabras se celebran, e a literatura demostra que, mesmo sen moita charanga, sabe montar unha boa festa.
