PRESENTACIÓN DO LIBRO O EXTRAÑO CASO DA BICICLETA AMARELA
PRESENTACIÓN DO LIBRO O EXTRAÑO CASO DA BICICLETA AMARELA DE HENRIQUE DACOSTA
A pesar da chuvia que caía en abundancia nos momentos previos á presentación do libro de Henrique Dacosta, a sala que acolleu o acto chegou a encherse igualmente. En forma de diálogo, o xornalista Xose Fandiño actuou de guía, realizando primeiro unha breve exposición biográfica do autor, para posteriormente formularlle a primeira das cuestións: o porqué deste novo libro. Dunha parte, a necesidade de querer tentar fixar tres textos previos xa editados con anterioridade co fin de non se dispersaren, e doutra, a publicación dos seis restantes, cuxa fasquía é nova, alén da incursión por vez primeira no teatro, coa inclusión dunha pequena peza dramática, que é o texto que fecha o libro, foi o seu principal argumento. Así mesmo, o título desta nova publicación, O estraño caso da bicicleta amarela, serviu para falar acerca do conto do mesmo título e chegar á conclusión de que moitos relatos nacen, á fin e ao cabo, de situacións episódicas reais, que son o núcleo central ou xénese deles, para logo desenvolver toda unha ficción de maior ou menor extensión, en que o realismo, o mundo onírico, así como o noso ser máis antropolóxico se van entretecendo. Falouse da técnica da escrita narrativa, sobre todo do xénero curto, tamén da novela, e aínda houbo tempo para algún dos asistentes poder formular algunha pregunta. O acto terminou coa sinatura por parte do autor de exemplares do seu libro, o cal puido ser adquirido na mesma sala grazas ao servizo de venda instalado pola Libraría Galiano.
