Cea aniversario 25 de abril
Unha noite no Muíño
Unha noite…
Unha noite… pode ser un fermoso encontro fraternal e solidario. E así foi a noite do 26 de Abril na que as xentes da ASC Muíño do Vento celebramos o noso aniversario. Encontro fraternal e solidario, no Centro Cívico de Canido. Por unha banda o Mar da Malata, pola outra a Terra de Canido e polo Vento ducias de cancións que agromaban de xeito libre dende o comezo ata o remate, xa ven entrada a noite.
Saúdos afectuosos e aperitivos na barra con balbordo de conversas . E tamén, como sempre ou como case sempre… a reflexión ventureira sobre Nós, sobre a ASC Muíño do Vento. Sobre a nosa fundación nun 25 de Abril de 2012, sobre o traballo arreo nestes sete anos e sobre a necesidade de acadar novos pulos e arelas para seguir en vindeiras muiñadas.
E ven a hora de achegarse a unha atractiva mesa. De vagar, novas conversas, xeralizados agradecementos a compañeiras e compañeiros que foron quen de organizar tanta exquisitez. E pouco e pouco o xurdir de propósitos, risas e brincadeiras , de cantos , de festa. Cantos de Abril que comezan con Grandola, van ata Fisterra, Camariñas, …para dar paso ao canto popular espontáneo con remate en Canido: “ Fun onte a Canido, mañá volverei”. Polo medio a sorpresa da chegada da agrupación Quenindiole que nos agasallou coa interpretación da súa fermosa música tradicional.
Despedida con novos cantos e contos e a satisfacción de ter reconvertida a copla popular:
Unha noite no Muíño
Unha noite …
Unha noite foi un fermoso encontro fraternal e solidario.
Canido, Abril 2019.
GALERÍA DE FOTOS