CELEBRACIÓN DO ANIVERSARIO DE MUÍÑO DO VENTO
CELEBRACIÓN DO ANIVERSARIO DE MUÍÑO DO VENTO
Como cada 25 de abril, a nosa Asociación celebrou algúns actos de conmemoración. E algúns deles, como xa ven sendo tradición, estiveron vinculados á lembranza do 25 de abril, data na que o pobo portugués se sacudiu o fascismo de enriba e iniciou un proceso revolucionario de carácter socialista que serviu de anuncio do que estaba por vir tamén na Galiza, na España que atravesaba a súa longa noite de pedra e, sobre todo, de impulso para sacar ao noso país irmán dunha etapa, xa moi longa, de escuridade e ditadura. Tamén é a data na que o pobo italiano celebra o día da derrota do fascismo en 1945 (L’anniversario della liberazione d’Italia, festa della Liberazione ou simplemente il 25 aprile). Algo que, tendo en conta o acaecido nos últimos tempos, débenos facer pensar sobre a importancia da memoria histórica.
Viñamos de celebrar, o día 22 de abril, a nosa comida de aniversario nas instalacións da SRD Canido, e de dedicar o noso programa radiado semanal “Unha tarde no Muínho” do luns 24 a lembrar ese 25 de abril de 1974 en Portugal. Para rematar este programa, no Centro Cívico, co espazo asignado para o seu desenvolvemento cheo de participantes, Antón Cortizas presentou unha conferencia na que, o noso amigo Francisco Faraldo, falounos do significado e evolución posterior dese 25 de abril de 1974 e dirixiu a audición dalgunhas das cancións que resultaron relevantes para o período.
Grândola, vila morena, Ronda do soldadinho, Tourada, O galo é o dono dos ovos, A nau Catrineta, Eu vi este povo a lutar, Nova do vento que passa, Os vampiros, Pedra filosofal foron as cancións que escoitamos e recordamos a Zeca Afonso, Jose Mário Branco, J. C. Ary dos Santos, Fernando Tordo, Sérgio Godinho, Fausto Bordalo Dias, Manuel Alegre, Adriano Correia de Oliveira, Antonio Gedêao e Manuel Freire, cantautores e compositores que animaron e contribuíron a construír a banda sonora dun camiño para á liberdade que non se termina de percorrer nunca pero que sempre nos enche de ilusión e ánimo.
Rematamos o acto saíndo do Centro Cívico, dirixíndonos ao Xardín do 25 de Abril e cantando, con máis ánimo que acerto melódico (todo hai que dicilio), o Grândola, Vila morena. Canción que serviu de contrasinal para iniciar o levantamento contra o réxime fascista portugués hai xa 49 anos. 25 de Abril, sempre! Fascismo, nunca mais!